Basauriko Udalak etxebizitza bi erosiko ditu, genero-indarkeriaren biktima diren emakumeak eta gizarte-larrialdi egoeran daudenak hartzeko

   Joan den osteguneko osoko bilkuran, etxebizitza bi erosteko 393.356 euroko aurrekontu-kontsignazioa egitea adostu zuten alderdi guztiek, genero-indarkeriaren biktima diren emakumeei eta udalerrian gizarte-larrialdi egoeran dauden herritar eta/edo familiak hartzeko.

   Neurri horri esker, bete beharreko baldintzak betetzen dituen bizilekua eskaini ahalko die Udalak zaurgarritasun-egoeran dauden basauriarrei. Erakundeak bazeukan lehenago ere harrerarako etxebizitza bat, Gizarte Zerbitzuei atxikita 1986tik, Piru Gainza kalean; baina etxebizitza hori ezin izan da sekula erabili, ez dituelako betetzen udal eskumeneko harrera-zerbitzuak eman ahal izateko indarreko araudiak ezarritako gutxieneko baldintzak (Gizarte Zerbitzuen Euskal Sistemaren prestazio eta zerbitzuen zorroari buruzko 185/2015 Dekretuak arautzen ditu zerbitzu eta baldintza horiek). Horregatik, hain zuzen ere, Piru Gainzako etxebizitza salgai jarriko du Udalak.

   Etxebizitza berri biak erosteko izapide guztiak burutu bitartean, Udalak badauka beste etxe bat, aipatutako gizarte-beharrizanak dituztenak hartzeko. Bizileku horrek ere ez ditu betetzen gaur egungo araudiak aurreikusitako irisgarritasun-betebehar batzuk, baina harrera-etxebizitza izateko baldintzak baditu, eta, behar izanez gero, erabili egin daiteke, beste etxebizitzak erosi eta ekipatu bitartean. Etxebizitza hori ere salgai jarriko da, udal etxebizitza berri biak prest egon bezain laster.

Basauri, 2020ko maiatzaren 12an.

Etiketak